لحسن السعدي الأستاذ يدافع عن مهنته التربوية ب "رأس مرفوع"

على خلفية الهجوم على البرلماني لحسن السعدي وعضو المكتب السياسي للتجمع الوطني للأحرار، حول رأيه بخصوص إضرابات الأساتذة ودفاعهم عن حقوقهم، وذلك خلال استضافته في برنامج “بدون لغة خشب”.

رد السعدي في تدوينة له على منتقديه:

كنتفهم بكل صدر رحب طموح نساء ورجال التعليم لتحسين وضعيتهم المهنية وهذا حق مشروع ، كيفما الاضراب حق دستوري الغاية منو هو ايصال رسالة للجهة المعنية باش تقبل تجلس مع النقابات اللي كتمثل موظفي التعليم ويكون حوار جاد وشفاف وبعدها تحقق المطالب في إطار المتاح والممكن وفي إطار المؤسسات.
ولكن اللي مكيبغيش يتفهم ليا هو ملي كنتهاجم على هاد الموقف اللي ما فيه تنقيص من أي جهة ، بل بالعكس كنظن باللي كنت واضح فاش قلت باللي كرامة نساء ورجال التعليم خط أحمر. وكيجي شي حد محسوب للأسف على الأساتذة وكيكتب ليا باللي مخاصنيش ننسى باللي "كنت غير معلم" 🤔
واش معلم أصبح معيور ؟
واش لهاد الدرجة حنا عزيز علينا جلد الذات؟
كيفاش بغينا نرجعو كرامة الأستاذ وبعض الاساتذة كيساهموا فتبخيس صورة الأستاذ؟
أنا فخور باللي كنت فالتعليم وتعرفت فيه على زملاء أعزاء ونقابيين شرفاء وكنوجه تحية تقدير لهم جميعا ولكل نبلاء هاد المنظومة اللي غادي تصلح وغادي ننجحوا جميع فتجاوز هاد المرحلة الصعبة.
الحوار هو الحل وما ضاع حق وراءه طالب محاور ✌️

ملاحظة: 📷 أنا سهلت المهمة على أي واحد باغي ينشر ليا صوري كأستاذ وسأبحث عن باقي الصور لنشرها براسي مرفوع