سناء عكرود ترد على منتقديها "بلاما تهزو ليا الهم"
ردت الفنانة المغربية، سناء عكرود على منتقديها، حول دخولها "الكوزينة"، ونسيانها عالم التمثيل والإخراج، عبر حسابها الرسمي على موقع تبادل الصور والفيديوهات أنستغرام.
وكتبت عكرود : "كيكتبوا ليا بعض الناس و كيقولوا : قابلتي الطواجن و الكوزينة و الولاد و نسيتي راسك و خدمتك بلا ما تهزوا ليا الهم، كندير الولاد و کنرضعهم وانا هازة كتاب فيديا، كنتصور معاهم ونا مشنتفة وماشابعاش نعاس".
وتابعت : "لكن فالغد ليه كنلبس مزيان و نخرج و نسهر و نشطح و نموت بالضحك، كنكتب و كندير الاخراج و الانتاج و التمثيل، خدیت جوائز و شهرة و اشادة بالخدمة ديالي الحمد لله و الشكر لله ، و للإشارة فقط، فاش علنوا بلي خدیت ثلاثة ديال الجوائز هنا فكندا على الفيلم الاخير ديالي "ميوبيا "، كنت فالكوزينة مشنتفة و هازة مغرفة كتحرك لا صوص لسباكيتي للعشا ، و شطحت بالفرحة أنا و المغرفة ديالي و ولادي کنكون بلدية و مدينية ، كنهز الحطب و نسكي الما و نکول اکسیون".
وأضافت :" كنهز بنتي فشوني و هي عندها ستة أشهر و كنطلع للمسرح باش نتسلم جائزة الاخراج و جائزة التمثيل و الجائزة الكبرى على عمل كتبتو و مثلت فيه و درت ليه الاخراج فاش كنت مقابلة الطواجن و الكوزينة و الولاد".
وختمت عكرود قولها مشيدة بدور المرأة في المجتمع: "لعيالات فالعالم كلو كيديرو بحالي وأكثر ، حتى حاجة ما كتخلعنا ، ماشي حيث حنا شدادات أو بغينا نتبتوا للعالم شي . حاجة ، لا . ، حيث حنا : عيالات".
